Van loug en laand (9)

Doede Bruinsma's jeugdherinneringen

Zwien.

Twaide Wereldoorlog was veur maiste luu in t Westen n tied van hongerlieden.
Wie hebben op Haarpel niks van schoarste of zowat te lieden had. Wie woonden ja tussen boeren in!
Wie haren vergunning van Landbaauwkommesoares om melk bie boer te kopen. Doarom hoalden wie alle doagen n poar kan volle melk bie Engel Fennemoa. Wie haren zölf hounder, dus aan aaier ook gain gebrek.
Allenneg vlais konnen wie nait zo veul kriegen, dat was op bon. Wie kregen voak wat as luu n zwien slachtten.
Op n dag zee mien moeke dat wie ook moar n zwien slachten mozzen. Moar veurdat je n zwien slachten kunt, mout je 'm eerst vetmezzen. Nou, in schure achter school was ruumte veur n zwienhok. Wie kochten n bigge.

Dat daaier haar t goud, hai gruide as n boeskool. Mien moeke kookte alledoagen n poar handen vol eerdappels extroa. Eerdappels haren wie zat, wie haren ja zölf n toene.
Engel Fennemoa kwam as goie boer n moal kieken of wie t wol goud deden. Dou zag e da t zwien hail mooi gruid was. Hai zee: "Dat is n mooi zwien om mit te fokken. Mag ik hom hebben? Dan krieg ie van mie n mooi zwien om te slachten".
Engel was wol te vertraauwen. Dus zeden mien olle luu, dat t goud was. Op n donkere oavend kwam Engel Fennemoa mit n zwienebak op krooie mit n zwien d'r in noar ons tou. Gaauw even oormaarken omruilen en hai gong weeromme mit ons zwien. Twai minuten loater heurden mien zusters dei op dat moment aan aandere kaante van Haarpel waren, al dat zwienen omruild waren. Zo gaauw gaait dat op n dörp!

Wie hebben t zwien slachten loaten en omdat mien moeke vrouger op n boerderij woond haar, wos ze hou alles inwekt worren mos, hou metworsten moakt worren en hou zieden spek aan beune ophongen worren.

Zwien was harstikke lekker!

Zai ook Doede's gedicht over t zwien.