Van loug en laand (7)

Doede Bruinsma's jeugdherinneringen

Dezembermoand.

Dezember is moand van de gezelleghaid. Eerst wordt Sinterkloas vierd. Wie deden dat vrouger ook. D'r kwam aaltied n Sinterkloas met n Zwaarte Piet bie ons in hoes. 'k Heb nooit waiten wel of dat waren.
Toun ik as kind zo haalf en haalf wel en nait meer aan Sinterkloas geleufde, kwam d'r moal n Sinterkloas mit n Zwaarte Piet dei bot zenuwachteg waren. Zwaarte Piet zien handen trilden hailemoal. Toun heb ik mien geleuf in Sinterkloas verloren...

Kerstfeest was aaltied n groot feest. Tied teveuren waren luu mit n lieste over Haarpel goan om geld op te hoalen, om t feest te betoalen.
Mensen van schoolbestuur gongen noar Metbroukbos en hoalden n haile grote kerstboom. Dei wör in school henzet en versierd. Örgel wör bie ons oet hoes noar school sjaauwd. Mien olste zuster Wippie mos op Kerstfeest speulen. Boeren brachten melk. Doar kookte mien mouder in kookpot sukkeloa van. t Aaltied n hail toer d'r veur te zörgen dat sukkeloa nait aanbrandde. As om n uur of fieve kerstfeest begon, waren kinder goud wazzen en mit zöndagse goud aan al n haile tied bie school. Op t feest vertelde mien voader t kerstverhoal oet Biebel en meester Krikke n aander mooi verhoal.
Wie mozzen dan omsdebeurt n tekst opzeggen, dei wie op school oet kop leerd hadden. Kinder kregen appelsien en n bouk. En sukkeloa mit n koukje vanzölf. Veur groten waren d'r scheurkalenders. Elke dag n blad mit op veurkaante n tekst en op achterkaante elke dag n stukje van n zuit verhoal over n bekering of zowat.

Op Oljoarsoavend was d'r gain vuurwaark zoas tegenwoordeg. Nee, luu zaten gewoon in hoes en wachtten op t neie joar. Olle luu tenminste. Jonge luu gongen voak d'r op uut om te kieken of d'r wat wegsleept worren kon.
Boeren wozzen dat en maisten zörgden d'r veur dat boudel goud opruumd was. Moar d'r was aaltied wel aine dei nait zo sekuur was. Doar wörren dan hail stillegies kipkarren, plougen, eggen en zo weghoald en op schoolplaain zet. D'r wörren haile baauwwaarken van moakt. Boer mos dan loater zulf moar zain dat e zien raif weeromme kreeg. Ik heb dat Oljoarsoavend 1952 nog doan mit Joakob Alvering, Engel Nijboer en nog n poar aandern. Engel Fennemoa was dei nacht n haile bulte dingen kwiet.
Anderndoags gongen wie Haarpel over om luu Gelukkeg Neijoar te wensen. Wie kregen dan overal n klokje. Aan t enne van dag waren wie dus nait zo helder meer...