Van loug en laand (6)

Doede Bruinsma's jeugdherinneringen

School

Haarpel haar n groot veurrecht boven aandere buurtschappen van Westerwolde, d'r was wat ze tegenwoordeg zo mooi zeggen kennen n "multifunctioneel gebouw": school. Overdag wörren kinder d'r leerd, 's oavends was t een soort dörpshoes. Knoapen-, meisjes- jongelings- en mannenverainen kwamen doar biemekoar.

Ainmoal in joar, in winter, haren verainegings oetvoering. Da wörren d'r toneelstukjes speuld, woar aal weken veur de tied veur repeteerd was. Schoefdeuren tussen baaide lokoalen wörren op zied schoven, baanken wörren in gaang e opstoapeld. Stoulen oet gaange wörren henzet. D'r wörren stropakken brocht. Op dei stropakken plaanken en coulissen wörren van schoolbeune hoald: zo wör d'r n toneel opbaauwd.

's Zöndags wör d'r kerke hollen in school. Aigentliek evangelisoatie. Toun school opricht is, hebben ze tegeliek n evangelisoatieveraineging opricht. Dei haar zowat zölfde bestuur. Meneer Clevering was evangelist. Dei woonde in Veelerveen en kwam op fietse noar Haarpel. Hai was n hail stoatige man mit slipjazze aan. Wie haren d'r aaltied lol in om te kieken hou meneer Clevering op fietse stapte. Hai deed dat op n hail stoere manier. Hai haar aan achterrad van fietse n stange, doar zette hai n vout op, zette zich mit aandere vout of en wupte dan noar veuren op zoadel. "Op bergen en in dalen, ja overal is God" was zien laivelingsgezang. Dat wör elke zöndag zongen. D'r was nog gain örgel in dei tied. Doarom was Geert Veldhoes veurzanger. Wel mit bule rondging wait ik nait meer.