Van loug en laand (4)

Doede Bruinsma's jeugdherinneringen

Kerdiet

Zeuventeg, tachteg joar leden waren luu gewoon om op zien minst ain moal in n joar 's oavends bie mekoar op vizite te goan. D'r wuir dan kovvie dronken en loater kwam de flezze op toavel: n borrel en veur de vraauwluu n glaske wien. "Samos van het eiland" maistens, dei kon je bie Hinnerk Kamies of Vraauw Van Hoorn kopen.
Of dei nog andere wien verkochten wait ik nait.

As pappe en moeke vot waren, bleven kinder allain in hoes. Dat nuimden wie kerdiet. As d'r grotere wichter in hoes waren, gongen wie kwoajongs d'r op of. Wie tikten op roeten en moakten allemoal geluden. Moar wichter haren natuurlek wacht aanzegd kregen dat ze gain jongs in hoes mochten loaten. Hou laanger t duurde, hou meer wie deden om wichter noar boeten te lokken. Zo hebben wie moal bie Jan Smid boven op dak lopen!

n Moal dochten wie dat d'r bie Raaint Nijboer ook kerdiet was. Wie d'r op of. Geluden moaken en op roeten tikken. Dou kwam opains Raaint Nijboer zölf op hozevöddels noar boeten en gaf mie n draai om oren, da'k steerns zag! Hai hef gelukkeg nait waiten wel of e n draai om oren geven hef, want toun ik anderdoags bie de Nijboers kwam, hef e naargens over proat.