Van loug en laand (3)

Doede Bruinsma's jeugdherinneringen

Dörsmesien

t Was veur kinder aaltied n hail feest as dörsmesien weer begon te waarken. Dan wör locomobiel mit dikke belgen van Hinnerk Potze oet schure hoald en noar korenbulten sleept. D'r heurden nog twai aandere stukken bie: kaaste dei t koren dörste en mesien dei stropakken moakte.

t Koren wör in zakken achter kaaste opvongen. As zak vol was wör dei deur n pakjedroager noar schure brocht. t Achterste mesien moakte stropakken, dei ook deur pakjesdroagers op n grote bult stoapeld wörren.

Wie speulden geern op strobulten, moar as d'r dörst wör, mochten wie dat nait omdat t te gevoarlek was. Wie konnen n zwoare stropak op kop kriegen. Bie kaaste mochten wie ook nait kommen, want kaaste wör aandreven mit grote raimen en as je dei tegen joe aan kregen!

Nee, veul fijner was t bie locomobiel. Dat ding poeste dat t n laive lust was. Sietze Nonkes was masinist. Hai mos törf op t vuur gooien en as t schofttied was, mos hai aan fluite trekken, dat t gierde. Boeten schooltied waren d'r aaltied jongs bie locomobiel. Sietze Nonkes muik droad om klompen, zodat kappe nait breken kon.

Hai sluig mit n hoamer n poar spiekers in klompe, dee n stuk droad in t vuur en as dat roodgloeind was, hoakte hai droad om spiekers. As droad kold worren was, was t krompen en zat t stief om klompe hen en kon kappe d'r nait ofbreken.

Haarpel hef ook n poar joar twai dörsmasienen had. Hou dat kommen is, wait ik nait, moar ik geleuf, dat boeren roezie hebben kregen, wel t eerst aan beurt wezen mog mit dörsen. Dut mie denken aan film "Fanfare" van Bert Hoanstroa...

Foto's van dörsmesien