Van loug en laand (23)

Doede Bruinsma's jeugdherinneringen

Wild.

Ik geleuf dat d'r tegenswoordeg wel reeën rondlopen in omgeven van Haarpel, moar zon zesteg, zeuventeg joar leden kwam d'r nait zoveul wild veur.

Wat hoazen en patriezen, woar in haarfst en winter op joagd wuir. Ik gong wel moal mit Wilt Kraai mit as driever. 'k Vond t fijn, om over t laand te lopen, woar ruumte was. Ik kreeg dan aan t enne n kwartje veur de muite. Boeren van Haarpel haren heur wildrechten verpacht aan joagers. D'r luipen voake zon vieve, zesse over t laand.

Bunsels en vozzen kwamen ook veur, ook aal konst dij nait zain. Moar dat ze d'r waren, konst in winter maarken: sporen in snij. Wie hebben n moal zon daaier 's nachts in hounderhok had. Aandernmörns lagen d'r dooie hounder in t hok. Dou hebben wie n schoeve veur t houndergat moaken loaten.

Adders kwamen in dij tied ook nog veur. D'r hef n zet n flezze mit n adder d'r in in school stoan. Dij haar aine dij hom vonnen haar bie meester brocht. D'r wörren voak biezundere daaier brocht. Vogels dij mien voader dan opstoppen luit deur n man in Onstwedde dij dat kon: n oele en n zoagbek. Deur joagers aanschoten.

Op winterdag kwamen d'r 's mörns en 's oavends haile vluchten kraaien overvlaigen. Zwaarte en bonte. Dij sluipen in t Metbroukbos en zöchten vreten op t laand. De bonte kraaien kwamen oet Skandinoavië hier overwintern.

Kievieten en grutto's kwamen ook veur. D'r waren joagers dij op kievieten schoten. Woarumme?