Van loug en laand (2)

Doede Bruinsma's jeugdherinneringen

Knoal

Het Muzzel-A-Knoal was veur ons aaltied n mooi stee om te speulen. Wie gongen d'r vizzen. As Flip Velemoa, de sluuswachter, sluus n endje openzet haar, konnen wie in t stromende woater hail goud mit wörms vizzen. Want boarzen zwommen dan tegen stroom in.

Moar ja, wie vongen ook hail voak snotters (rivierdonderpad?). Dei haren n hailebulte sliem en hail haarde stiekels. Wie gooiden ze nooit in t woater weeromme, zoas wie mit aandere vizzen deden.

In sömmer as t mooi waarm weer was, gongen wie zwemmen in Knoal. As doe die zölf zwemmen leren haarst vanzulfs. Wel nait kon zwemmen, gong in t VoedingsKnoaltje n beetje sparteln. Dan kwam vanzölf de tied, dat je kon blieven drieven. Zo heb ik mie zölf ook zwemmen leerd. Moar nou ken ik t nog aaltied nait goud.

t Knoal wuir in dei tied nog veul deur schepen broekt. Schippers dei törf oet Drenthe noar stad brachten of stroatendrek veur boeren. n Enkele schipper haar n motor, moar maisten haren zaailen. Dei mozzen ze noar beneden doun as ze in sluus gongen. Doarom ston d'r n bord mit "Strijk" aan kaante. As d'r gain wind was, mos schip trokken worren mit peerd. Luu dee dat deden haitten scheepsjoagers. Maistens was dat toamelek roeg volk. Moar as schipper zo aarm was, dat e gain scheepsjoager betoalen kon, mozzen hai of zien vraauw schip mit zelen veur borst trekken. Dan gong schip voutje veur voutje veuruut. Dat was n haard leven!

's Winters was Knoal voak dichtvroren. Dan gongen wie scheuveln. Op scheuvels noar Onstwedder Sluus of noar Bleksleger Brugge. Ook gebeurde t wol n moal dat d'r flaauw vis was. Dan haar d'ain of aandere fabriek vergifteg woater in Knoal loaten lopen en kwamen vizzen noar lucht happen. Doe konst dan haile dikke vizzen zo oet t woater pakken. Zo hef Flip Velemoa n snouk van meer dan n meter vongen. Hai zee: "Net of 'k mit n kerel ston te vechten".