Van loug en laand (19)

Doede Bruinsma's jeugdherinneringen

Middenstand (II)

Renke Wiebrands kwam aaltied op Harpel mit "pak". Dat waren manufacturen, verpakt in zaaildouk. As e bie deure kwam, wör pak op grond of op toavel oetspraaid en konden vraauwluu zain wat e te koop haar.

Gerrit Nijboer hef ook n zet ook mit pak lopen. Doar haar e goaren, spelden en aal zuk soort klaingoud in. Omreden Gerrit n zet bie n kapper in Ellersinghoezen waarkt haar, konst bie hom in hoes dien hoar knippen loaten.

Ook kwam d'r geregeld n paitereuliekerel. Harpel was in dij tied nog nait op t elektrische net aansloten, aal luu haren n paitereulielaampe en t eten wör op n kookkaggel of n paitereuliestel kookt. Paitereulie wör deur paitereuliekerel oet n groot vat eerst in n moat van n kan meten en dan over n trechter in n vaaierkanteg blik mit n tuut goten.

Ast vaste klaant bie paitereuliekerel wast, kreegst aal moand n kraande, "De Automaat". Doar ston veur kinder n stripverhoal in over n negerjonkie, dij "Pijpje Drop" haitte. Aan t ende ston aaltied "Hoe t verder Pijpje Drop vergaat, staat in de volgende Automaat." Op leste bladziede stonden antwoorden op braiven dij kinder aan Tante (of Oom?) ... stuurd haren. Ik heb d'r ook n poar keer instoan.

Zon paitereulie-kookstel kon wel moal te haard brannen. Dan kwam d'r n haile bulte kwaalm of. Ast d'r nait gaauw bie wast, kreegst haile hoes vol dikke, vette kwaalm. Veurdast dat weer schoon hast...