Van loug en laand (18)

Doede Bruinsma's jeugdherinneringen

Middenstand (I)

In de joaren datteg haar Haarpel nog twai winkeltjes: van vraauw Van Hoorn en van Hinnerk Kamies (Wel was d'r veur Hinnerk Kamies? Ik kan mie nog herinnern, dat ze komen binnen).

Kenst begriepen dat dizze twai winkels nait veul verkochten. Om dij reden haar vraauw Van Hoorn kostgangers in hoes. Eerst meester Krikke en dou dij traauwde en in Vlagtwedde wonen gong, Albert van Hoorn, de melkrieder. Hinnerk Kamies mos mit peerd en woagen in Muzzel bie klanten laangs om genog te verkopen.

Wie kwamen as kwoajongs voak biemekoar veur winkel van Kamies. Wie kochten doar slik: Lekker-is en sukkeloarepen van "Prijt". Sigretten kostten drai stuvers veur n pakje van twinteg. "Fifty-fifty" haitten dij.

Hinnerk de Groot dij bie Onstweddersluus n winkel haar, kwam ook mit peerd en woagen ainmoal in de week op Haarpel. Hai was aaltied tot loat in oavend op pad, omreden hai geern laank bie luu proaten bleef.

Wie konnen aal doagen frizze stoete eten, want elke dag kwam d'r wel n bakker mit zien peerd en kar op Harpel. Op moandoagen zölfs twai: Van Dam en Hilgengoa; bakker Ten Hoave, ook oet Onstwedde, kwam twaimoal in de weke.

n Slagter kwam nait, omreden luu van Harpel zölf in oktober aalmoal n zwien slachtten. Wie haren dat -behalve in oorlog - nait en doarum gong mien voader aal zoaterdagsnoamiddags op fietse noar Vlagtwedde om zok scheren te loaten bie Joke Maaier. Doan hoalde hai bie slagter Bakker aaltied vlais. Eerappels en gruinte haren wie zölf, omreden wie n toene haren.

Andermoal t vervolg.