Van loug en laand (17)

Doede Bruinsma's jeugdherinneringen

Scheuveln.

Ik geleuf dat Westerwolde t koldste stee van Nederlaand is. Oardriekskundebouken zeggen dat d'r n gemoatigd laandklimoat is. Doarum vrust t bie ons aaltied meer as bieveurbeeld in Zeelaand.
Scheuvels Om dij reden konden wie as kinder aaltied hail gaauw scheuveln. Ik geleuf da'k aal scheuveln kon, dou ik n joar of zezze, zeuven was.
En ik hebt goud leerd, want in 1986 heb ik Elfstedentocht in Fraislaand nog scheuveld en Roelfinoa (mien vraauw) en ik doun as t aits moar ken mit aan Meulentocht in Alblasserwoard. Wie scheuveln 's winters nog aal weken op kunsties in Dordrecht.

D'r ston bie de Meulenkaamp 's winters voake n stuk laand under woater en as t vroren haar, konst doar hail gaauw op scheuveln. Jan Potze en ik hebben ook wel es scheuveld op iezel op weg! As t laanger vroor, was sloot dij in dij tied laangs Harpelerweg luip, ook dichtvroren. En dan t Knoal natuurlek. Dan scheuvelden wie noar Onstwedder Sluus of noar Bleksleger brugge.
As t beetje vroren haar, wol t ies ook aal hail gaauw hollen op Fabriekslaand, zoas wie dat nuimden. Officieel hait dat Vloeiveld, is t nait?

As t laank winter was, wuir scheuvel ophongen tegen Onstwedde of Ellersinghoezen of aandere dörpen. Dat betaikende dat zon dörp oetdoagd wuir veur wedstrieden. Ik wait nait, hou dizze wedstrieden ofluipen.
Ken aine mie doar wat van vertellen?