Van loug en laand (16)

Doede Bruinsma's jeugdherinneringen

Masjesees.

Tegenswoordeg hebben luu gain respekt meer veur pliesie, wor d'r zegd.
Nou, dat was in mien kindertied wel aans! As wie in Onstwedde moal bie duustern gekhaid mit wichter moakten, zodat wichter begonnen te gieren zoas ze ja gaauw doun, huifde Boltje de Vries moar n poar woorden te zeggen om te loaten heuren dat e d'r was. Dan waren wie votdoalek rusteg.
Joa, dij Boltje de Vries was n echte dörpsveldwachter, dij d'r goud de wind under haar.
Wie haren in gemainte Vlagtwedde gain veldwachter, moar masjesees. Dij woonden in masjeseekazerne aan Onstwedderweg in Vlagtwedde. Waren d'r in Vlagtwedde masjesees umreden dat n grensgemainte is?
Masjesee pedde Masjesees reden op fietse deur gemainte om te kieken of ales goud was. Zai kwamen ook voake op Haarpel.
Ik was vrouger as de dood veur masjesees. As ik boeten speulde en ze aankomen zag, gong ik aaltied gaauw in hoes. Toch haar 'k wel n zuver gewaiten!
In oorlog wuir veul pliesiewaark doan deur landwachters. Dij haren as woapen n jachtgeweer. Zai huilden mensen aan om persoonsbewies te kontroleren. Landwachter Maaier oet Jipsinghoezen hef n moal n Engelse vlaiger vongen. Dij was oet vlaigtuug komen, dij bommen op Haarpel valen loaten hef.
D'r is n verhoal, dat n landwachter moal hailendal overstuur bie masjesees kwam en zee dat d'r op hom schoten was. Koegels waren hom um oren vlogen. Hai was sikkom roakt. Masjesees geleufden dat nait zo. Dou ze wieder vruigen, kreeg ain van masjesees inains in de goaten wat d'r gebeurd wezen kon. Hai zee: "Loat mie joen geweer ais zain", Landwachter dee dat en wat was d'r gebeurd? Zien aigen gweer, dij e op rogge druig, was ofgoan!
Zo kloug waren dij kerels!