Van loug en laand (13)

Doede Bruinsma's jeugdherinneringen

Noamen.

Net as overaal, haren veul luu n bienoam. Zon noam was nait beduild om te schelden, moar heurde d'r gewoon bie. Ik hoop doarom dat t mie nait kwoalek nomen wordt, dat ik ze hier vertel.

Haarm van Hoorn wör aaltied 'Poedel' nuimd, omdat hai in n toneelstukje van knoapenveraineging n moal blavven mos as n hond. Zo kreeg Menno Klok de noam 'Menno Sikke'.
Geert Rendering (aigentliek hait e Geert Jan Christiaans) was 'Sjingsjang'. Woarumme? Dou d'r nije meester op schole kwam, vruig dei aan kinder hou ze haitten. Geert zee hail rad "Geert Jan Christiaans". Meester vruig; "Wat? Sjingsjang?".
Hinnerk Nijboer haitte ook wel 'Kovacs', (noar n Hongoarse muzikant? Omdat e bie muziekkorps was?) en zien bruier Gerrit 'Pikkard'. Noar de wereldberoumde daipzeeduker Professor Picard. Ze zeden dat ze op mekoar leken.
Dan was d'r nog Haarm Schiet. Da's dudelk, liekt mie. Hai wör ook wel Haarm Slof nuimd. As t haard regende, zee e "t Is n tikkel slof". Jan van Hoorn wuir 'Jan Vet' nuimd. Hai mos van melkfabriek in Laude bie boeren vetgehalte van melk meten. Ook was d'r nog 'Haarm Duutser'. Dei woonde bie Doanje. Hai kwam oet Duutslaand en haar n stoere Duutse noam.

Ie zain, dat t onschuldige bienoamen binnen, nait beledigend of zo.