Van loug en laand (11)

Doede Bruinsma's jeugdherinneringen

Haarpel, niks in de reken.

Zesteg, zeuventeg joar en nog langer leden waren luu op Haarpel aarm. Grond was nait zo best en luu mozzen haard pokkeln om wat te verdainen. Luu van aandere dörpen haren Haarpelers nait veul in de reken. As je zee, dat je van Haarpel kwam, trokken luu neuze n beetje op.
Ik wait nog dat d'r n keer n optocht mit versierde woagens was in Vlagtwedde. Dou haar Joke Maaier, de kapper mit drogisterij, n woagen moakt mit doarop luu dei as zigeuners aantrokken waren. Aan woagen n groot bret, woarop "Harpel" ston. Haarpelers waren doar hail gramnieteg om. Zai kwamen nooit meer bie hom in winkel.
In jannewoari 1945, vlak veur bevrijding wörren d'r n haile bulte NSBers, dei op Dolle Dinsdag noar Duutslaand vlucht waren, deur Duutsers noar Nederland terugstuurd. Dei mozzen onderdak hebben. Gemainte hef ze allemoal noar Haarpel stuurd. Doar wörren ze bie luu in hoes onderbracht. Ik ken mie nait herinnern, dat d'r ook noar aandere steden van gemainte NSBers stuurd bent.
Moar Haarpelers hebben zain loaten, wat goud is. Dou noa oorlog kollekteerd wör veur oorlogsslachtoffers, hebben Haarpelers in deursnee maiste van haile gemainte geven! Dat was ook zo bie geldinzoameling veur slachtoffers van woatersnood in 1953.
As doe op raaize in aarme laanden komst, bint luu veul gastvrijer as in rieke laanden. Aarme luu willen die wol t leste geven wat ze hebben. Om die n plezaaier te doun.
Ik heb t aan Haarpelers te danken, dat ik nou nog aaltied meer respekt heb veur n aarbaaider dei zien waark goud döt, dan veur n minister dei zien zoaken nait veurmekoar kriegen kan...