Van loug en laand (10)

Doede Bruinsma's jeugdherinneringen

Poasken.

Poasken is wol nait zon feest as t kerstfeest, moar toch keken wie as kinder en ook as groten d'r aaltied noar uut.
In eerste ploats natuurlek t aaier eten, dat doun ze tegenwoordeg ja ook nog.
Moar t mooiste was t poaskevuur. Op haaide achter t hoes van Raint Nijboer wörren d'r takken en aander holt opstoapeld, stro van n stropak lösmoakt en d'r in stopt en dan aanstoken. t Was moar even, dan brandde dat t rappelde. Kinder buitelden om t Poaskevuur hen en haren grootste lol. Groten keken tou of d'r gain ongelukken gebeurden.
Mit Poasken gongen wie ook neutenschaiten. D'r wör dan n laange plaanke n beetje schuuns noar boven henlegd. Speulers mozzen dan neuten opzetten op n riege achter mekoar. Dan mozzen speulers omstebeurt mit n iezeren koegel perbaaiern de neuten d'r of te schaiten. Wel de veurste neuten d'r of schoot, mog dai hollen.
Dat nuimden ze dun. Wel d'r neuten tussen oet schoot of hailemoal achter weg, mos net zoveul neuten d'r bie op plaanke leggen. Dat was dik. As d'r gain ploats meer was veur neuten , mozzen d'r centen oplegd worren. Maistentied waren dat moar n poar centen, wie speulden nooit zo grof.
Moar ik heb wel es heurd, dat op andere steden d'r wol es hail grof om geld speuld wör.