Doede Bruinsma

Van loug en laand (5)

Doede Bruinsma's jeugdherinneringen

Speulen


Kinder over haile wereld speulen. Wie ook. Wichter gongen taauwtjespringen en jongs pirdje mennen. Je was natuurlek laiver boer dan peerd. Moar as t joen beurt was om peerd te wezen, was je n hail wild peerd dei nait noar boer luusterde. As t knikkertied was, gongen wie koegeln. Want knikkern in n potje of zo wat dat wol nait in t lözze zaand.
Want stroate is d'r pas noa oorlog komen.

Nee, wie gongen koegeln. Wie haren almoal n koegel van n poar centimeter deursnee en dei gooiden wie in woagenspoor. Aandern mozzen dan perbaaiern koegel te roaken en as dat lukte, mos hai dei zien koegel roakt was, n knikker betoalen aan hom, dei koegel roakt haar. As je aal knikkers verloren haar, was je buut, moar veur n cent kon je weer twintig knikkers kopen. Ook gongen wie houpeln. Houpel was n fietsrad woar spoaken oethoald waren. Mit n spieker aan n stok stuurden wie houpel deur woagenspoor.

Op schoolplaain speulden wie spellegies as "Schipper mag ik overvaren?" en andere kringspellegies. D'r ging wol moal ain van wichter noar vakantiekolonie en dei kwam dan weer mit nije kringspellegies. Op schoolplaain stonnen vrouger n stuk of acht bomen en doar speulden wie boomtikkertje mit. En dan natuurlek overlopertje:
Wie mozzen dan van aine kaante van plaain noar aandere kaante lopen. D'r ston aine doar tussen in, dei mos overlopers tikken. Wel t eerst mos wezen, wör oafteld: "Ot, bot, kat vot". Wel overbleef mos 'm wezen.
Ook speulden wie "Bok, bok, hauveul hoorns". Dan ston d'r aine veurover, n aander sprong hom op rogge, stak n poar vingers omhoog en dan mos bok roaden hauveul vingers d'r omhoog stoken waren. As hai t'roaden haar, mos de aander achter hom veurover goan stoan. Zo kon d'r wel n haile riege komen en wör t aalmoar stoerder om bie eerste te komen.
Bokje springen deden wie ook: d'r stond aine veurover en aander kinder mozzen d'r overhen springen en dan ook veurover staon goan. Zo kregen je n haile riege achtermekoar.
Welke van dizze spellegies worren d'r nog speuld?

Copyright © 2000 Doede Bruinsma (doedeb@aol.nl)
Op-/aanmaarkens, aanvullens heb ik geern.


| Ol Graitje | Knoal | Dörsmesien | Kerdiet | Speulen | School | Dezembermoand |
| Winteroavend | Zwien | Poasken | Haarpel, niks in de reken | Bimbam | Noamen |
| Krisistied | Eerappelkraben | Masjesees | Scheuveln | Middenstand (I) | Middenstand (II) |
| Toene | Melk | Moderne techniek | Wild | Verkeer |

© Harpel.nl - Sitemap - Disclaimer - Nonix