Doede Bruinsma

Van loug en laand (22)

Doede Bruinsma's jeugdherinneringen

Moderne techniek.

Tegenswoordeg hebben lu sikkom aalmoal tillevisie en tillefoon in hoes, mor in de joaren datteg was dat nait zo. n Poar lu op Haarpel haren radio: wie en Aaike Velthoes. Bie Raaint Nijboer hebben zai ook zetje aine had.

RadioDij radio's wazzen hail ingewikkelde apperoaten. Zai bestonden oet n zwaarte kaaste mit laampen d'r in en n haile bulte droaden. Aan radio zaten twij laange droaden, aine was in grond ingroaven, d'aander gong omhoog noar t dak. Lös van de zwaarte kaaste ston n loedspreker, n hail groot ding, net zo opvalend in koamer as n tillevisie tegenswoordeg.

'k Wait nog da'k veur eerste keer n radio zag en heurde. Dat was in 1931 bie n ome van mie in Fraaislaand. Wat n wonder was dat, d'r pruit aine oet n kassie! Mien moeke zee nog "t Liekt wel of d'r n kabouter in dat kassie zit". Oet de roadio kwam meziek, hail blikkerg. Wat n verschil mit de haifai van tegenswoordeg!

Ainmoal op n dag wuir d'r bekend moakt "Wij schakelen nu over naar de versterkte zender". Dan mozzen wie zo gaauw as wie konden noar t kassie um aan knoppen te draaien, aans kwam d'r n gierend geluud oet. Dat wuir "de Mexikaanse hond" nuimd.

Bie Raaint Nijboer haren zai n grammefoon. n Kassie mit n slinger um hom op te winden en n haile grode hoorn. Ook de muziek doaroet was hail blikkerg. Zai haren ain ploade van Willy Derby, n zanger. De leste regel van dat laid was "Als ik naar jouw blinde ogen kijk".

Dat de tillevisie d'r aankwam, haar ik aal in kraande lezen. Bie Philips hebben zai in de joaren datteg aal eerste oetzenden had.

In oorlog mozzen wie de radio's inleveren. Duutsers wollen nait dat d'r noar de Engelse zender luusterd wuir. Nou haren mien ollers net veur oorlog n nije radio kocht. Dij wör votstopt en wie hebben n hail olle kapotte radio oet Fraislaand kommen loaten en dij inleverd.

Tillefoon was wel bekend, mor allenneg Flip Velemoa haar as sluuswachter aine van wotterschop. Dij was neudeg um bericht te kriegen dat sluus open mos of dichte. D'r luipen droaden aan poalen van Onstweddersluus noar Haarpelsluus noast fietspad laangs knoal.

Ast opbellen wolst, most hoorn van hoake pakken, aan n slinger draaien en dan kreegst n juffraauw aan liene en most zeggen mit welk nummer doe verbonden worren wolst. t Kon asmis n haile zet duren veurdat verbinden d'r kwam.

'k Wait nog da'k harstikke zenewachteg was, dou k veur t eerst opbelde...

Copyright © 2002 Doede Bruinsma (doedeb@aol.nl)
Op-/aanmaarkens, aanvullens heb ik geern.


| Ol Graitje | Knoal | Dörsmesien | Kerdiet | Speulen | School | Dezembermoand |
| Winteroavend | Zwien | Poasken | Haarpel, niks in de reken | Bimbam | Noamen |
| Krisistied | Eerappelkraben | Masjesees | Scheuveln | Middenstand (I) | Middenstand (II) |
| Toene | Melk | Moderne techniek | Wild | Verkeer |

© Harpel.nl - Sitemap - Disclaimer - Nonix