Doede Bruinsma

Van loug en laand (20)

Doede Bruinsma's jeugdherinneringen

Toene.

Bie ons hoes in Haarpel lag n haile grote toene. Tenminste, zo heb ik dat as kind aaltied zain. En vergeleken mit toene, dij ik nou bie hoes heb, was e ook hail groot.

Veur en op opzied van t hoes was t mooi aanlegd mit stroeken en bomen en n pad dat zok doar deurhen slingerde. Dat pad haarkte mien voader aal zoaterdoagen hail mooi aan, zodat t d'r zundoags schier bie lag. Achter t hoes haren wie n gruintetoene en in houk n blaikveldje woar nog n poar haaidestroeken in stonden. Ook was d'r n stok mit aalberens , krudoorns, frambozen en ittjebijen.
Kersenboom Laangs toene aan kaande van Raaint Nijboer stonnen kaarzebomen dij in veurjoar hailendal wit waren van bluite.

In julimoand waren kaarzen riep. Sprooien vraten maiste kaarzen op, moar d'r bleven zat over veur ons. D'r wörren n haile bulte opeten en inweckt.

Achter t hoes stonden appelbomen. Grunneger kroon, man, wat waren dij appels lekker!
Um toene hen ston n laange hege dij elk joar knipt worren mos. Dat was n hail waark.

In gruintetoene verbaauwden wie gruinte vanzölfs en eerappels. Mien voader haar d'r n haile toer aan um ales goud schoon te hollen. As zundoags luu noar kerke in school kwamen, wol e ales mooi schier hebben.

t Gebeurde hail voake dat mien voader aarften of aander zoad zaaid haar, dat 's mörns vroug hounder van Raaint Nijboer aarften opvreten en mooi aanlegde gruintebedden kapotkraabd haren.

Omreden mien voader ook schriften van kinder noakieken mos en dunderdagoavends mannenverain laide, har hai bie zummerdag voake gain tied um kraante te lezen. Kraanten bleven wel moal n haile weke liggen, veurdat e zundoags d'r tied veur haar. Dan gebeurde t wel moal dat e -as e n kraande van n week old zat te lezen - zee: "D'r is ook n vraauw vermoord in Delfziel, hè?". "Aalweer?" ruipen wie dan, "veurege weke ook aal aine!"

Aan aandere kaante haren wie n hounderhok en doarachter lag nog grond woar niks mit doan wör. Doar heb ik voake hutten baauwd. Nou stait doar t dörpshoes.

Copyright © 2001 Doede Bruinsma (doedeb@aol.nl)
Op-/aanmaarkens, aanvullens heb ik geern.


| Ol Graitje | Knoal | Dörsmesien | Kerdiet | Speulen | School | Dezembermoand |
| Winteroavend | Zwien | Poasken | Haarpel, niks in de reken | Bimbam | Noamen |
| Krisistied | Eerappelkraben | Masjesees | Scheuveln | Middenstand (I) | Middenstand (II) |
| Toene | Melk | Moderne techniek | Wild | Verkeer |

© Harpel.nl - Sitemap - Disclaimer - Nonix