Doede Bruinsma

Van loug en laand (14)

Doede Bruinsma's jeugdherinneringen

Krisistied.


Vlak veur oorlog was t aal n slimme tied. D'r waren n haile bulte waarklozen. Deur waarkverschavven wörren mensen aan t waark zet, moar d'r wör hail waaineg mit verdaind. En oetkerens waren hail loag. De leste haaide dei d'r nog was, wör ontgonnen. En laand dat aal ontgonnen was, wör herontgonnen om grond beter te moaken. De zaandweg van Haarpelsluus noar Ellersinghoezen wör hail daip oetgroaven zodat woater in grond zakken kon en weg 's winters nait zo modderg en d'r in sömmer nait zoveul mulzaand meer was.
Veul luu perbaaierden n poar lözze centen te verdainen mit n handeltje. Dan kochten ze n kissie mit bukkens, zetten dei veur op fietse en gongen bie hoezen laangs om bukkens weer te verkopen. D'r kwam n moal aine mit tomoaten. Wie wozzen nait wat dat veur dingen waren. Ze zagen d'r hail lekker oet en dou wie d'r aine kregen, wollen wie ze opeten. Moar eerste hap speiden wie oet. "Arregat, wat smoaken dij dingen vies!" Tomoaten moust eten leren net as bier drinken.
D'r kwamen ook voake luu mit speulgoud bie school. Ast n poar vodden gafst, kreegst d'r speulgoud veur.
Veul kinder deden dat. Zo haren luu weer n poar stuvers verdaind...

Copyright © 2001 Doede Bruinsma (doedeb@aol.nl)
Op-/aanmaarkens, aanvullens heb ik geern.


| Ol Graitje | Knoal | Dörsmesien | Kerdiet | Speulen | School | Dezembermoand |
| Winteroavend | Zwien | Poasken | Haarpel, niks in de reken | Bimbam | Noamen |
| Krisistied | Eerappelkraben | Masjesees | Scheuveln | Middenstand (I) | Middenstand (II) |
| Toene | Melk | Moderne techniek | Wild | Verkeer |

© Harpel.nl - Sitemap - Disclaimer - Nonix