Doede Bruinsma

Van loug en laand (1)

Doede Bruinsma's jeugdherinneringen

Ol Graitje


Vrouger luip d'r n stoomtram van Winschoot over Vlagtwedde noar Teroapel. Dei was van "Stoomtrammaatschappij Oost-Groningen", ofkört tot OG. Luu moakten d'r aal gaauw Ol Graitje van.

Ol Graitje

Dei tram dee d'r van Vlagtwedde noar Winschoot sikkom n uur over. Je konnen net zo gaauw op fietse goan. Moar as t slecht weer was, was dei tram wel mooi natuurlek.

In 1933 is veur dei tram n busdainst in stee kommen. Ook de moderne tied brak in Westerwolde aan. In oorlog, dou d'r gain benzine meer te koop was, hebben ze Ol Graitje weer teveurschien hoald en wör de tram in ere hersteld, zoas ze zo mooi kennen zeggen. Aan end van oorlog is Ol Graitje zölfs n moal beschoten deur Engelse vlaigtugen.

Ik zat in dei tied op knoapenverainiging van Haarpel, mit de mooie noam "Samuel". Wie muiken elk joar n raaize. Dou d'r nog buzzen reden, noar t vlaigveld in Eelde en speultoene in Poaterswolde. Moar in oorlog gongen wie noar Emmen, noar daaierntoene. En bie Hotel Grimme was n speultoene.

n Keer zollen wie mit tram noar Emmen goan. Wie jongs op fietse noar Vlagtwedde. Doar mozzen wie wachten op meester Krikke. Dei was laaider van knoapenverainiging. Hai woonde in Vlagtwedde. Dou wie aankwamen, was meester Krikke d'r nog nait. Dou tram aankwam, was e der nog nait. Wie zeden tegen masjinist, wat der aan haand was. Masjinist trok n poar keer haard aan fluite, moar gain meester Krikke. Dei haar zuk versloapen. Dou kon tram nait laanger wachten en gong vot. Dou meester Krikke endelk kwam, binnen wie goan lopen, langs tramrails over Wollinghoezen noar Jipsinghoezen. Dou wie doar waren, kwam volgende tram en binnen wie instapt.

Copyright © 2000 Doede Bruinsma (doedeb@aol.nl)
Op-/aanmaarkens, aanvullens heb ik geern.

t Laid over Òl Graitje


| Ol Graitje | Knoal | Dörsmesien | Kerdiet | Speulen | School | Dezembermoand |
| Winteroavend | Zwien | Poasken | Haarpel, niks in de reken | Bimbam | Noamen |
| Krisistied | Eerappelkraben | Masjesees | Scheuveln | Middenstand (I) | Middenstand (II) |
| Toene | Melk | Moderne techniek | Wild | Verkeer |

© Harpel.nl - Sitemap - Disclaimer - Nonix